Sögur af upplýsingatækni í leikskólum

Annað verkefnið sem ég kynnti með kollegum mínu var um afrakstur síðasta árs í DILE verkefninu.

DILE – Norrænt samstarfsnet um upplýsingatækni og skapandi starf í leikskólum
Torfi Hjartarson, lektor, MVS, HÍ, og Svava Pétursdóttir, lektor, MVS, HÍ

Glærurnar eru fullar af myndum og gefa bara óljósa mynd en, um þetta má lesa á bloggi verkefnisins https://dileprojekt.wordpress.com

Ágripið:

Upplýsingatækni býður upp á nýjar leiðir í námi og skapandi starfi á öllum skólastigum og á allra síðustu árum hafa sveitarfélög, mörg hver, lagt aukna áherslu á möguleika fólgna í notkun fartækni í leikskólastarfi, spjaldtölvur og snjallsíma, og raunar fleira tengt tækni í skapandi leik. Samstarfsnet byggt á NordPlus-verkefninu DILE (Digital Learning in Preschool) hefur leitast við að þróa og rannsaka notkun stafrænna verkfæra í leikskólum. Þátttakendur eru leikskólakennarar, stjórnendur leikskóla á sveitarstjórnarstiginu og rannsakendur frá öllum Norðurlöndunum. Til að kortleggja og efla notkun á spjaldtölvum og öðrum stafrænum verkfærum í leikskólum eru rýnd fyrirliggjandi skrif, leikskólar og háskólar í fimm löndum sóttir heim, rætt við starfsfólk og skipst á hugmyndum og reynslusögum á alþjóðlegum fundum, samfélagsmiðlum og þar til gerðum vef. Þróunarstarf og tilraunir hafa gefist vel; tæknin kemur að miklu gagni í sérkennslu og í almennu starfi gengur vel að ýta undir ýmiss konar ígrundun barnanna, samskipti, miðlun og sköpun, ekki síst með myndatökum og ýmsu sem þeim tengist. Tæknin kemur líka að góðum notum við skráningu á uppeldisstarfinu og í samstarfi við foreldra. Hér verður sagt frá ýmsu því sem verkefnið hefur skilað og greint frá hugmyndum um næstu skref.

Auglýsingar